யோசேப்பு ஒரு தலைவராக மட்டுமல்ல, சிறந்த நிர்வாகியாகவும் விளங்கினார். தேவனுடைய அழைப்பு, தேவன் அளித்த வரங்கள், மேலும் அவர் வாழ்க்கையில் பெற்ற அனுபவமும் திறமையும் ஒன்றிணைந்து அவரை வல்லமையுள்ள தலைவராக உருவாக்கின. யோசேப்பு பதினேழு வயதில் அடிமையாக விற்கப்பட்டார் (ஆதியாகமம் 37:2). பின்னர் அவர் பார்வோனின் முன்னிலையில் நின்றபோது முப்பது வயதுடையவராக இருந்தார்; அதற்கு முன் இரண்டு ஆண்டுகள் சிறையில் இருந்தார் (ஆதியாகமம் 41:1,46). இந்த பதின்மூன்று ஆண்டு விசுவாசப் பயணமெங்கும் கர்த்தர் அவரோடு இருந்தார்.
நிர்வாகத்தில் பட்டப்படிப்பும் முதுநிலைப் படிப்பும்:
இந்த பதின்மூன்று ஆண்டுகள் யோசேப்பின் கல்வி, பயிற்சி, திறன் வளர்ச்சி மற்றும் அவரது குணநலன்களை வடிவமைத்த காலமாக அமைந்தது. முதல் பதினொன்று ஆண்டுகள் போத்திபாரின் வீட்டிலும், அடுத்த இரண்டு ஆண்டுகள் சிறையிலும் கழிந்தன.
பொது நிர்வாகப் பயிற்சிப் பள்ளி
யோசேப்பின் கற்றல் பயணம் சீராக இருந்தது; அவர் சூழலுக்கு ஏற்ப விரைவாகத் தன்னை மாற்றிக்கொண்டார். தலைமைத்துவப் பொறுப்பை ஏற்கும் முன்பே, அவர் பொறுப்புடன் நிர்வகிக்கும் திறனைக் (stewardship) கற்றுக்கொண்டார்.
முதலாவதாக, மொழி கற்றல். அவருக்குத் தன் வீட்டில் பேசப்பட்ட மொழி (ஒருவேளை அந்தப் பிராந்தியத்தின் வட்டார வழக்கு) தெரிந்திருந்தது. இப்போது அவர் எகிப்திய மொழியைக் கற்க வேண்டியிருந்தது.
இரண்டாவதாக, எகிப்திய கலாச்சாரத்தைக் கற்றுக்கொள்ள வேண்டியிருந்தது. செயல்பாட்டு முறைகள், நடத்தை, நாகரிகம், சமூக நெறிமுறைகள், இடம், நேரம், பேச்சு, உடல் மொழி, மனப்பான்மை மற்றும் பல அன்றாடச் செயல்பாடுகள் இதில் அடங்கும்.
மூன்றாவதாக, தனது பணிகளையும் கடமைகளையும் மேற்கொள்ளும் முறைகளைக் கற்றுக்கொள்ள வேண்டியிருந்தது. ஒவ்வொரு கலாச்சாரத்திலும் அன்றாடப் பணிகளைச் செய்வதற்கெனத் தனித்துவமான முறைகள் உள்ளன.
நான்காவதாக, எழுதுதல், நினைவில் கொள்ளும் குறிப்புகளை எடுத்தல், எழுத்துப்பூர்வமான குறிப்புகளை எடுத்தல், கணக்கு வழக்குகள் பார்த்தல், மனிதர்களை அறிந்துகொள்ளுதல், போத்திபாரிடமிருந்து கட்டளைகளைப் பெறுதல், அவரது எதிர்பார்ப்புகளைப் புரிந்துகொள்ளுதல், பணியாளர்களைத் தேர்ந்தெடுத்தல், பணிகளைப் பிரித்தளித்தல், தொழிலாளர்களுக்குப் பயிற்சி அளித்தல் மற்றும் வீட்டு நிர்வாகத்தில் உள்ள அனைவரையும் மேற்பார்வையிட்டு நிர்வகித்தல் ஆகியவற்றைக் கற்றுக்கொண்டார். போத்திபாரின் மனைவியையும் சமையலறை நிர்வாகத்தையும் தவிர மற்ற அனைத்தும் அவருடைய பொறுப்பில் இருந்தன.
ஐந்து , மனிதவள மேலாண்மை, சொத்து பராமரிப்பு, களஞ்சிய நிர்வாகம், குடும்ப நிர்வாகம், தகவல் தொடர்பு, விவசாயம், கால்நடை பராமரிப்பு, விருந்தோம்பல், பாதுகாப்பு மற்றும் அன்றாட செயல்பாடுகள் போன்ற துறைகளில் நேரடி அனுபவத்தைப் பெற்றார்.
சிறப்பு நிர்வாகப் பயிற்சிப் பள்ளி
சிறையில் கழித்த இரண்டு ஆண்டுகள், அரண்மனை நடைமுறைகளையும் பேரரசு நிர்வாகத்தையும் கற்றுக்கொள்ளும் சிறப்பு பயிற்சியாக அமைந்தது. அவருடன் இருந்த கைதிகள் பலர் அரண்மனையில் பணியாற்றியவர்கள். அவர்கள் மூலம் அரண்மனை மரபுகள், நடைமுறைகள் மற்றும் பேரரசை நிர்வகிப்பதற்கான முக்கியமான அறிவுரைகளை யோசேப்பு பெற்றார். தேவன் அவரை பார்வோனின் அரண்மனையில் உயர்ந்த பொறுப்பிற்கு உயர்த்துவதற்கு முன், இந்த எல்லா அனுபவங்களாலும் அவரை வடிவமைத்து ஆயத்தப்படுத்தினார்.
என் வாழ்க்கையில் தேவன் தந்துள்ள அழைப்பை நிறைவேற்றுவதற்காக, அவர் என்னை பயிற்றுவித்து வடிவமைத்து வருகிறாரென்பதை நான் உணருகிறேனா?
Rev. Dr. J.N. Manokaran