ஞானத்தின் தொடக்கம்

ஒருவர் இவ்வாறு கூறினார்;
“Google என்பது அறிவின் தொடக்கம்; AI (செயற்கை நுண்ணறிவு) என்பது ஞானத்தின் உச்சம்.” தகவல் தொழில்நுட்பப் புரட்சி, மலிவான கருவிகள், எளிதில் கிடைக்கும் தரவுகள் காரணமாக, பலர் Google-ஐ அறிவின் ஆரம்பமாகவும், AI -ஐ ஞானத்தின் நிறைவாகவும் எண்ணுகின்றனர். இவ்வாறு எண்ணுகிறவர்கள் உண்மையில் பரிதாபத்துக்குரியவர்கள்.

உண்மையான ஞானம்:
“கர்த்தருக்குப் பயப்படுதலே ஞானத்தின் ஆரம்பம்” (நீதிமொழிகள் 9:10). Wi-Fi மூலம் மேலிருந்து வரும் தகவல்கள் போல தோன்றினாலும், அவை ஏமாற்றமளிப்பவையாக இருக்கலாம். உண்மையான ஞானம் மேலிருந்து, அதாவது பரிசுத்தமும் சர்வ அதிகாரமும் நித்தியமுமான தேவனிடமிருந்து வருகிறது. பூமியிலுள்ள ஞானம் ஆவிக்குரியதல்ல; அது சாத்தானுக்குரியது. பொறாமையும் சுயநலமும் ஆட்சி செய்யும் இடத்தில், கீழ்த்தரமான செயல்களும் குழப்பமும் சட்டமின்மையும் தோன்றும். ஆனால் தேவனால் அளிக்கப்படும் ஞானம் முதலில் தூய்மையானது; பின்னர் சமாதானமுள்ளது, சாந்தமானது, இணக்கமானது, இரக்கமும் நல்ல கனிகளும் நிறைந்தது, பாகுபாடற்றது, கபடமற்றது (யாக்கோபு 3:15–17).

எது? ஏன்?
“வாழ்க்கை என்றால் என்ன?” என்ற கேள்விக்குப் பதில் அளிப்பது வேதாகமம் மட்டுமே. மனித புத்தி வரையறுக்கப்பட்டதாய் இருப்பதால், அளவற்ற தேவனை தானாக அறிந்து கொள்ள முடியாது. தேவன் தம்மைத் தாமே கிருபையுடன் தமது பரிசுத்த வேதாகமத்தின் மூலம் வெளிப்படுத்தினார். மனிதர்கள் பரிணாம வளர்ச்சியால் தோன்றியவர்கள் அல்ல; மறுபிறவி எடுக்கும் இனமும் அல்ல. அவர்கள் தேவனுடைய மகிமைக்காக, தேவனுடைய சாயலின்படி படைக்கப்பட்டவர்கள் (ஆதியாகமம் 1:27; ஏசாயா 43:7). மனித வாழ்க்கையின் “எது” மற்றும் “ஏன்” என்பவை கண்டறியப்படாவிட்டால், அந்த வாழ்க்கை துயரமானதாகவே இருக்கும்.

எப்படி?
மனித மரியாதைக்குத் தகுந்தவாறும், தேவனுடைய மகிமைக்காகவும் எப்படி வாழ வேண்டும் என்பதை வேதாகமம் மட்டுமே போதிக்கிறது. இந்த உலகில் ஒவ்வொருவருக்கும் தேவன் ஒரு திட்டம் வைத்திருக்கிறார். தம்முடைய சித்தத்தை நாடுகிறவர்களுக்கு அந்தத் திட்டத்தை வெளிப்படுத்துவது அவருக்குப் பிரியமானது. அத்தகையவர்கள் ஒப்பற்ற / நிகரற்ற சமாதானத்தையும் உயர்ந்த நோக்கத்தையும் தங்கள் வாழ்க்கையில் கண்டடைகிறார்கள்.
மற்றவர்களுக்கு வாழ்க்கை பாரமாகவோ, வீணாகவோ, நோக்கமற்றதாகவோ, அர்த்தமற்றதாகவோ தோன்றுகிறது. தெய்வீக ஞானத்தால், ஒருவர் நீதியான வாழ்க்கையை நடத்தி, தேவனை மகிமைப்படுத்தி, பிறருக்கு ஊக்கமளித்து, குடும்பத்திற்கும் சமுதாயத்திற்கும் தேசத்திற்கும் ஆசீர்வாதமாக மாற முடியும்.

அடுத்து என்ன?
மனிதர்கள் இந்த உலகில் பிறந்து மரிப்பதற்காக மட்டுமே படைக்கப்படவில்லை. அவர்களுடைய வாழ்க்கை நித்தியமானது. ஆனால் இறுதி இலக்குகள், இந்த வாழ்க்கையில் எடுக்கும் தேர்வுகளால் தீர்மானிக்கப்படுகின்றன. தேவனுடைய குமாரனாகிய கர்த்தராகிய இயேசு கிறிஸ்துவைத் தேர்ந்தெடுக்கிறவர்கள், அவரோடு பரலோகத்தில் நித்திய ஜீவனைப் பெறுவார்கள். அவரை நிராகரிக்கிறவர்கள், நித்தியமாக நெருப்புக் குளமான நரகத்தில் அழிவடைவார்கள்.

நான் ஞானமான தீர்மானம் எடுத்திருக்கிறேனா?

Rev. Dr. J.N. Manokaran