நினிவேயின் ராஜா

வேதாகமம் நினிவேயின் ராஜாவின் பெயரை நேரடியாகக் குறிப்பிடாமல் அவரைப் பற்றிக் கூறுகிறது. (யோனா 3:6) இஸ்ரவேலின் ராஜாவாகிய இரண்டாம் யெரோபெயாம் (கி.மு. 793-753) ஆட்சி செய்த காலத்தில் யோனா வாழ்ந்தார். அக்காலத்தில் அசிரியாவை ஆண்ட ராஜாக்களில் ஒருவராக 'அதாத்-நிராரி III' (கி.மு. 811-783) அல்லது 'சல்மனேசர் IV' (கி.மு. 783-773) இருந்திருக்கலாம்.

மாற்றம்:
கொடுமை, இரக்கமின்மை, அடக்குமுறை மற்றும் வன்முறையின் அடையாளமாக இருந்த அந்த ராஜா, தேவனுடைய வார்த்தையைக் கேட்டபோது தன்னைத் தாழ்த்தி, உபவாசத்தோடும் ஜெபத்தோடும் தேவனை நாடிய பக்தியுள்ள மனிதனாக மாறினார்.

அனைத்து மக்களுக்குமான தேவனாகிய யெகோவா:
யோனாவைப் போலவே, பல இஸ்ரவேலரும் யெகோவா இஸ்ரவேலின் தேவன் மட்டுமே என்று எண்ணினர். ஆனால் யெகோவா ஒரு சிறிய தேசத்தின் அல்லது ஒரு குறிப்பிட்ட மக்களின் தேவன் அல்ல; அவர் வானத்திற்கும் பூமிக்கும் ஆண்டவராகிய சர்வவல்லமையுள்ள தேவன். அதனால்தான் அவர் யோனாவை வாக்குத்தத்த தேசமான இஸ்ரவேலிலிருந்து அந்நிய நகரமான நினிவேக்கு அனுப்பினார்.

ஜெபங்களைக் கேட்கிற தேவன்:
“ஜெபத்தைக் கேட்கிறவரே, சகல மாம்சமானவரும் உம்மிடத்தில் வருவார்கள்” (சங்கீதம் 65:2). யோனாவின் தீர்க்கதரிசனச் செய்தியைக் கேட்ட நினிவேயின் ராஜா, தேவனுடைய சத்தத்திற்குச் செவிகொடுத்து, அதன் உண்மையை உணர்ந்து, வரப்போகும் நியாயத்தீர்ப்பிலிருந்து தப்புவதற்காக தேவனை நாடினார். கிருபையுள்ள தேவன், புறஜாதியினனும் துன்மார்க்கனுமான அந்த ராஜாவின் மனந்திரும்புதலையும் ஜெபத்தையும் ஏற்றுக்கொண்டார்.

ஆழமான மனந்திரும்புதல்:
ராஜா தேவனுடைய செய்தியைக் கேட்டவுடன் தாழ்மையுடன் பதிலளித்தார். அவர் தமது சிங்காசனத்திலிருந்து எழுந்து, அரச ஆடைகளை கழற்றி, சாக்குடை அணிந்து சாம்பலில் உட்கார்ந்தார் (யோனா 3:6). இதன் மூலம் தமது பெருமை, பதவி, அதிகாரம், சுயநம்பிக்கை ஆகிய அனைத்தையும் துறந்து, தேவனுக்கு முன்பாக தன்னைத் தாழ்த்திக் கொண்டார். அரச மகிமையின் அடையாளமான ஊதா நிற ஆடைகள் அகற்றப்பட்டு, மனந்திரும்புதலின் அடையாளமான சாக்குடை அணியப்பட்டது.

தேசிய அளவிலான மனந்திரும்புதல்:
ராஜா இதை தனிப்பட்ட முறையில் செய்யவில்லை; பொதுமக்களின் முன்னிலையில் செய்து, தமது அதிகாரத்தைப் பயன்படுத்தி நகரமெங்கும் மனந்திரும்புதலுக்கான அழைப்பை விடுத்தார். மனிதர்கள் மட்டுமல்ல, கால்நடைகளும் கூட உபவாசத்தில் பங்குகொள்ள வேண்டும் என்றும், அனைவரும் தேவனை ஊக்கத்தோடு கூப்பிட வேண்டும் என்றும் கட்டளையிட்டார் (யோனா 3:7–8). மக்கள் தங்கள் தீய வழிகளையும் வன்முறைகளையும் விட்டு விலகி தேவனை நோக்கித் திரும்ப வேண்டும் என்று வலியுறுத்தினார். அவர் உறுதியான, பொறுப்புள்ள, தேவன் கொடுத்த அதிகாரத்தை நன்றாகப் பயன்படுத்திய தலைவராக விளங்கினார்.

தெளிந்த சிந்தனையுடன் கூடிய ஜெபம்:
மனந்திரும்பினால் தேவன் நிச்சயமாகத் தண்டனையை நீக்கிவிடுவார் என்று ராஜா கருதவில்லை. அதற்குப் பதிலாக, “யார் அறிவார்? தேவன் திரும்பி இரங்கி, தமது உக்கிரக் கோபத்தை விட்டு விலகினால் நாம் அழியாமல் இருப்போம்” என்று கூறினார் (யோனா 3:9). அவர் தமது பாவங்களை ஒப்புக்கொண்டு, மனந்திரும்பி, முழுமையாக தேவனுடைய கிருபையையே சார்ந்திருந்தார். இது உண்மையான விசுவாசத்தின் அழகிய வெளிப்பாடாகும்.

தாழ்மையுடன் மனந்திரும்புகிறவர்கள்மேல் தேவன் இரக்கமும் கிருபையும் காட்டுகிறவர் என்பதை நான் உணர்ந்து வாழ்கிறேனா?

Rev. Dr. J.N. Manokaran